Catbalogan

          Ha imo bongto ko akon iguinhahalad an ngatanan

 

          an akon  mga inop, an akon mga  adlaw ug mga gab-I,

 

          an akon mga paghangyo ug mga pangamuyo,

 

          ang mga samad han honahona ug ha lawas ko,

 

          mga pagbakho ug pagrayhak,

 

          ano man nga lipay an hikaplagan ko ug da-ot nga omabot,

 

          an akon paanlimbasog hi-agui-an an himaya para ha imo

 

          kay higugma-on ko ikaw.

 

 

 

          Kay sogad hin usa nga mahigugma-on nga iroy

 

          waray ka maghalot han ngatanan

 

          nga angay ihatag ha usa nga minayoyo.

 

          Imo iguintobyan tikang han akon kaguti pa

 

          an imo nga kabubkiran nga diin didto ko hipokrati

 

           an damo nga maka-iipa nga mga botang ha kinabuhi:

 

          huni hin magkadirodilain nga mga tamsi,

 

          hamot hin magkadirodilain nga mga bukad,

 

          bunga hin magkadirodilain nga mga kahoy,

 

          boses han magkadirodilain nga tominungnon didto nga mga hayop.

 

           Waray na daw masama pa hin kamatam-is

 

          han imo pana-on, tisa, sodsoron,

 

          kamarasa sogad han imo saging, bayabas, gorom-on,

 

          santol, tambis, pili, banano ug mansanitas

 

          nga iguinkalipay han akon batan-on nga mga panu-igon.

 

          Hino an diri magpapasalamat hin dako

 

          tungod han matin-aw ug masolog nga tubig

 

          han imo kasalogan ug mga sapa

 

          nga diin ako nahibaro maglangoy, manholaw, magbogsay

 

          hin baloto ngain man ito pagdad-a

 

          han batan-on ko nga panhonahona –

 

          mapa-iraya, mapa-ilawod togob pirme

 

          hin kalipay an kasingkasing?

 

          May masama pa ba hinkamaroroyag  an pagbinaktasa

 

          han imo kabubkiran?  Waray sol-ot ha tiil,

 

          temprano ka-opay ug yumogon pa an kadalanan,

 

          guinbabaybay ko na an pira na kabeses nga guintaraan

 

          nga mga agui-anan la han akon mga tiil.

 

          Diri ngani manmalabtik  hin tokmo, balod, pago, tatahilaw,

 

          tinggaw, pikoy, abokay ug iba pa nga mga tamsi,

 

          mananalag  kay marasa an bonay nga tinoon

 

          o kon di man manmimitik  kay waray na gad masama pa

 

           hin kamakalilipay an hibaro nga an imo laang

 

          may-ada na ngay-an nabitay nga ponay o tikling.

 

          Ngan ma-oli ha balay gool hin duro an lawas,

 

          lagayon an mga tiil,  mahamdas an lawas,

 

          kagis-an mga botkon ug dapit nagkakanay hin diri ma-ihap

 

          nga mga alimyon han kagorangan

 

          pero kay an honahona  ug an kasingkasingsugad an pagrayhak.

 

          Waray na daw masama pa hin kariko han imo kadagatan

 

          nga diin haros an ngatanan nga isda aadto.

 

          An pusod hihi nga imo kadagatan  amo an Maqueda

       

          nga diin kadak-an nga tawo an nabubuhi.

 

          Waray daw mas marasa pa han imo hamorok, langbiyaw, agomaa,

 

          tingag, kabasi, toros, osoos, sapsap, bolinaw, gonggong,

 

          lari, milongbilong, tangigue, panit, balo

 

          ug kadak-an pa nga mga isda

 

          nga didto gudla ha imo kadagatan panhihidakpi.

 

          Labot han imo isda , hino an diri magdadako

 

           tungod han imo magrasa  ngan magkadirodilain nga mga panagti-on

 

           sogad han ponaw, bokawel, sarad, sabolod, binga, boo,

 

          polpol, sisi, yowad, boskay, lagokay, boranday ug iba pa

 

          nga waray ha iba nga logar/

 

          Waraay haros mga anak an diri magpapasalamat  hin dako

 

          tungod han kamagtambok han imo mga masag ug alimango,

 

          an magkadirodilain nga ubod ug han kamagboga han imo mga doma?

 

       

 

     

          Bolahan ka, akon bongto, iroy han akon mga inop.

 

          Han langbo pa an akon mga panu-igon

 

          ikaw an waray pagpahoway nga nagtimangno ha akon,

 

          nagtotdo han mga misteryo han kalibutan,

 

          naghatag han mga baton han akon kadam-am nga paki-ana

 

          an nagtotdo han angay ko pag-agui-an

 

          basi ko sngpoton an angay ko hingadto-an.

 

          Nagssosobo ako yaaana.

 

          Iguintatangis ko an imo yaana kabotangan.

 

          Guinpabay-an ka na han kadam-an nimo nga mga anak.

 

          Uinlimot ka na ug an imo mga pag-araba,

 

          pagngoyngoy, pangamuyo waray na namamati.

 

          Guinlingo ka na.

 

          Guintitinawaan ka na la ngani yana

 

          han waray haros nga mga anak nimo.

 

          Diri ka na daw babalikon nira.

 

          Nagwaray labot na hira kay magkusog naman hira.

 

          Diri ka na nira kinahanglan.

 

          Salit, iguintatangis ko an imo yana kamotangan.

 

 

 

          Waray na an imo kagorangan.

 

          Pinamolod na an mga robasan nga kahoy.

 

          Ipinanongo na an imo anay magrampag, dahonon nga kahoy.

 

          Guinkaingin  na an anay kahoyon nga mga logar.

 

          Kogon, kotikot ug poti na la yana an siyahan nga hinkikit-an akon mga mata.

 

          Nagparik na an kadak-an nga tuna

 

          dara   kay waray naman an mga gamut nga nakapot ha ira. 

 

          An imo mga salog hagbabaw na ug waray na didto

 

          an pokot, haro-an, oroon, kasili.

 

          An imo mga sapa pinanhobsan na .

 

           An iba pa nga mga tanom nagkamatay na

 

          kay waray naman makakaon ha imo katonaan.

 

          Di na mag-iiha mawawaray naliwat

 

          an mga isda ha imo kadagatan.

 

          Himyas na tungod han badil ug iba pa

 

          nga mara-ot nga mga paagui hin pagdakop ha ira,

 

          an pagroba han mga boronayan han isda,

 

          an pagkotaw han kasaralan  ug han pagkawat

 

          han diri angay pagkoha-on nga mga botang han dagat.

 

          Nagkakahihilo  an mga isda han imo dagat ug salog

 

          Dara han magkadirodilain ngan bag-o nga panggawi han tawo yana.

 

          Damo na han imo mga anak an nagsasakit

 

          dara han hinayhinay nga kawarayi nira han grasya

 

          han imo kabubkiran, salog, tuna ug kadagatan.

 

          Kay miyentras buhi pa ako,

 

          miyentras aada ka pa ha akon honahona,

 

          miyentras an dugo nimo aada pa ha akon mga ogat,

 

          miyentras ikaw pa gud an minayuyo han akon kasingkasing

 

          akon kokontrahon an hitarabo.

 

          An akon kalag ug lawas akon igtotobyan han waray rohadoha

 

          Agod la homalawig pa an imo kinabuhi

 

          Kay higugma-on ko ikaw, bongto ko.

​

​

​