Nagbuburoburo nga daw iginkukunod an kastilyo nga hanang 

 

han honahona

 

          Han hinayhinay nga ginpapanas ito han nata-ob nga dagat

 

          Nga’n mga karamoy nagsosohot ha gi-otan han mga dahon han niyo-tiyo,

 

          Lomoton nga mga sanga han lipata, mayapi ug bakhaw,

 

          Nagpapahot-pahot nga mga gamot han kalambayongan,

 

togbo ug sagasa.

 

          Diri na mag-iiha lolonopon an bog-os nga goba-goba

 

          Nga natikang didto ha pangpang han Mercedes

 

ngan natubtob ha Kanlapwas.

 

          Poroy-aanan liwat ito han takray, tambayokyok,

 

                     al-al nga mga alimango

 

          Ngan han ma-intremis nga tamsi nga pangatigan.

 

          Mga adlaw ngani nga an ta-ob sogad hin kadako

 

          Pati an balanak, sogi, langbiyaw, oso-os

 

                    ug iba pa nga mga isda

 

          An nasoba dara han kadak-an  nga grasya

 

                    nga natikang ha iraya han Antiao.

 

          Didto ha banika ngan ha mga bolod-bolod

 

          Ha ligid han hito nga kahadi-an nga berde

 

          Napoyo an tiktik-bolan nga’n inadlaw nga opisyo,

 

sogad han kanan siwit,

 

          Amo an pag-inonggiton ha loyo han nagrarakdag

 

nga mga darag

 

          An batan-on nga parapamalabtik

 

          An ngiya-ngiya ngan han tamboraray sogad man kasotil

 

          Nga’n bog-os nga kakorolpon mahingangadto la

 

          Han pag-idarakop ha ira pinaagi han pagsaklang

 

          Han mga sanga han mogos ngan han anislag

 

          Ug han pagbinantay han igin-ogobok nga gihay

 

          Nga’n katapusan gin-alinghoran hin polot

 

                    nga tikang han tagok han langka.

 

          Panahon adto han kalompihig nga tominongnon

 

                    han kabarasan han Maqueda

 

          Ug han sapi-sapi nga himo hin putos

 

                    han mansanas di ngani aranghita

 

          Nga pinili didto han panhapilan ha pantalan

 

          Nagpapas na adto nga mga higayon.

 

          An hintatan-awan ko nala yana

 

          Amo an usa nga babayihay

 

          Nga natokdaw ha baybayon han Punta de Jesus

 

          Ngan naglala-om nga’n tidara-on nga mga balod

 

          Onta magmogo ha iya kon an kakolop

 

          Ma-oli pa nga may bukad nga kalipay.

​

​

​