Copyright Notice: All content on this website is the property of the estate of Aniceto Llaneta and protected by Philippine and international copyright laws. All unauthorized data harvesting (including data scraping and similar data extraction techniques for training AI models), reproduction, or transmission is strictly prohibited. For permissions and proper citation, contact estrellamaqueda2024@gmail.com. Legal action will be taken against non-compliance.
.png)
Malino
Mahagkot an lomoton nga bato
ha salad han matin-aw nga salog han Lologayan.
An mga teel nga kanina pa ginbabaybay
an kakotikotan ngan agopawon nga pusod
han hini nga hinpokratan nga tona
karoyag na pomahoway.
Osa nala ka-otok higugma-on ko nga sangkay
ngan kahoman aaboton ta na an aton karadto-an.
An lagayon ug madalunot nga sagkahon
diri angay ikabodlay.
Baman kon aton na sangpoton
an pongkay han hini nga bokid
tikang didto poro na an dalan logsaron.
Katima hito aton na hitatan-awan
an kotikot, anahaw ug kawayan nga balay
ni Apoy Tonyo.
Ha balitang pala tatapoon kita layon
han makagurutom nga hamot
han paghaha-ona pala nga tinoon
nga bag-o nga bari nga kalinayan.
Mamimili la kita han igpapadis:
diniisan nga obod,
hinaroman nga otan nga agitway, udlot han gaway,
binonay nga tarong ngan lapyo nga dahon han hagnaya
o hinatokan nga pokot.
Antes bomaya ha lamisa igtututdo ha imo
ni Apoy Tonyo an nabitay ha igbaw han abohan
nga osa ka-bolig nga tagiptipon nga hinog
nga bangaran.
Kahoman hin mga osa ka-sapad
Sagun-dalagan ngan hinihibol
nga masarok ha biso hin osa ka-hongot
nga mahagkot ngan matarotam-is nga tubig
nga inalog ha borabod nga natikang
ha ilarom han nagpapahot-pahot
nga mga gamut hin osa nga lagas na nga gapas
ha sinirangan nga bahin han harani nga bolod.
Pagtog-aba ha imo nga nasandig ha bintana
nga nagtatan-aw han kagorangan nga inaatobang
igdadako ngan igkakalipay han imo kasing-kasing
an baraan niya nga ngaran:
Malino!
