APOY TONYO

Parapamanwa adto hiya.

Labot han kaparag-oma, iya adto

ikadoha nga pakabuhi, opisyo,

himalang-anan, kalilbangan

ug kalipayan.

An bati ko sogad hiya hin kabantugan

Nga waray gud malabaw han iya hibaro-an

Hi-onong han arikos, batong, tolakop,

kalap, bitik ug balatik.

Nangangayam na ngani adto hiya,

sering han akon amay nga agsob

ig-opod han olitawohay pa hiya,

Di daw nakakharayo ngan hindadakpan

An ma-ola, an magindose nga bogsok,

an laag ug an ihalas.

An olot, miro, garong ug iba pa

nga tominongnon han goba

Naghihirot ngan nalikay gud ha iya.

An pisik, haro-an, oro-on, pantat ug kasili

Sogad hin kamag-anad ha iya mamagkalayog

Ngadto hin osa kadaba nga hatok

nga may tinoltog nga dolaw

ngan hin ogbos han parang

Namamarayaw nga makikig-angay han iya kompas.

Ma-iha na nga bomaya hi Apoy Tonyo.

An iya pirme nga taklos nga sondang,

An arikos, an batong, an garab ug an sogob

Waray na didto han ira bobotangaan.

Bomaya hi Apoy Tonyo han hinay-hinay

Nga nagkakawagra an kagorangan han Malino.

Mga waray pili’n ginpopokan.

Hinay-hinay liwat hadto nawara

An toog, naga, hamorawon ug apitong.

An pana-on, tisa ug sodsoron di na hadto hin-aagi-an

An kasapaan agsob na panhobsan

Ngan nagpaparik na’n kaigangan.

An tobtoban han kan Apoy Tonyo kinabuhi

Katapusan na liwat han ikinabubuhi

han mga didto-anon.

Ha iya mga apo sogad ha akon

waray hiya iginbilin

Kon di an sagdon: Panlimbasog kamo

ngan paniguro

Nga’n logar nga iyo ginmat-an

Diri paghadi-an han kotikot

ngan han amol nga sondang.

Pasagdan la ngani niyo dayon nga kamo

nga lolonopan.