TOLO KA-OTOD NGA HIMANGRAW

I

Manaol, manaol, adoy kamagool.

Manatad, manatad, kadi daw an batad.

Takray, takray, homana na iton nga pagkinaykay

Kay waray na gad dida an ginbibiling mo nga boskay.

Saguksok, saguksok, ano iton nga ginbubukbok?

Di ba bonay nga nabugok?

Lopad na, atatahilaw, palagiw na!

Aada na baya an tag-ada han hagna.

Siwit, siwit, nagbubulbog san it im panit.

Seguro daw ada tumang-ob ka na liwat

han kanan mananggiti kawit.

Balod, balod, pagkita ko hi ikaw nalatod.

Seguro daw ada asay nimo naman hinmorangtan

An hilos-hilos nga botod.

Porit, porit, dapit ka man na-oorit.

Seguro daw ada an imo salag ginkolnit.

Kalaw, kalaw,bati ko nga hi ikaw nag-oohaw.

Dara ito kay patay na an halawihaw

Ngan han ora-ora nga horaw.

* * *

II

Alagad, alagad, hain an imo balay?

Aadto ba hit bagangbang o harani la hit baybay?

Lomoton ba ito didto ngan madalonot?

Kon di man barason ngan masapnot?

Alagad, alagad,hino man an imo sangkay?

Opod ba nimo an toway, lagokay ug boskay?

Ka-oyag ba nimo an noos, tamala ug pikay?

Imo ba iginkaka-onot an lobayan ug tipay?

Alagad, alagad, naiindig ako hit imo kalipay,

Hin nakikigroromba ka, nakikigtagotago-ay,

nakikigrotos-rotosay

Dida ha Maqueda opod an imo mga sangkay.

Ginkokolopan kamo, dire ginugol-an,

waray pagpahoway.

Alagad, alagad, ano man osahay

Di ko ikaw hinkikit-an, mataob ug aya-ay?

Nahadlok ka ba dara han togon ni nanay

Nga dire ngatanan ha Maqueda imo sangkay?

* * *

III

Daw odpan daw wawang,

daw omang, daw apan.

An siday ginhohorma

ngan ginkokortihan

Didto hin nagboborobohawi

nga kasidsidman.

Im kakarahamon an olo

ug an ikog kakapyotan.

Han im bog-os nga kosog

ug paghigugma.

Im ini nga nagkokonong

ngan maranggat nga mananap

Iisahon ngan iglalabog

hin malanoy

Ngadto hin masanag

nga kawan.

Im it bibingbingon

ngan kikilal-on

Kon amo na ito an onod

han im mga inop,

Kon amo na ito an ubod

han mga nahitabo

Ngan kon amo na ito an kahimo

han gintipigan ngan ginmayuyo.

* * *