INKO ENDONG

---

Nahoyot ha iya nga sogbong an kinawo

Nga dakolaay nga botok hin pinanggi

nga abaka nga laag,

Kakolop pa gin-ihap na’n tingka nga mga balagon

han hagnaya

Nga opod pagdadad-on ngadto ha Catbalogan

Kanda Pureza nga asawa ni Kaya

nga anak ni Benjamin ngan apo ni Podi

nga bantogan nga tahor ngan may-ada mga ganador

nga tikang pa kono ha Kaanahawan

ngan namamakyaw hin kopras, sinako nga mani

ngan hin magkadirodilain ngan doma.

Dara han horaw ngan han doron

Pira la kaposo hin ma-is

Ug pira la ka-takoyan hin gahi-on nga lingcod

An hinawkan han dagohan.

Baman an ginlala-oman nga kalinayan

ngan han minantika nga pilit

Didto han bag-o nga kaingin

Hinrag-an han kotikot ngan han nagkakalayo

Nga handab han nagbobotak nga tona.

Matari an gaway nga mika ngan daw mga pigos.

Baman an karingkit kon di man bokbokon

temprano pa nga ginbolas han ma-ola.

Paglarang na gad ada ini han Makagarahom,

Pahayag ni Inko Endong.

Kay ano nga maski ngani an oro-on ngan han pisik

Waray na didto ha salog ug kasapaan?

Sogad man an takoranga ngan han kosasapa

Ngan han hani anay nakadto han mga paklang han palawan

Ug ha mga lado han kapaw-an

Opod an ira mga lambong nga namagkagikan na.

Han paglakat hin pira katu-ig an baraktason nga dalan

Tikang ha Kag-usipan ngadto ha Solangan

Tonokon na ngan daw nagkakalayo

an kada dopa nga tinutumban.

Asa na hito nga nag-inoma. Baya-i na ito.

Baman an mana-ol hindakpan na

Ngan an kasing-kasing han kagurangan

Mga tood nala ngan hin nagpaparik nga igang.

Sagdon kan Inko Endong hanin orhi nga pagdolhog.

Paghornal nala dinhi ha Catbalogan

Kon di man pagpa-oripon.

* * *