KON HI AKO AN IMO GINHIGUGMA

Pagtatangbiron an aton mga lawas didto hin guti-ay nga simbahan

nga an atop himo hin tarotagkip nga mga inop

ngan hin nagpapahotpahot, nangongorog nga mga tingog

nga natikang hin mga but-ol nga ginnanana, nadudunot.

An iya bungbong igwawalwal an magpakangingirhat

nga pag-araba hin mga minasos-an nga’n mata nanlili-at

ngan an katatawa hin kadaragan-an nga’n mga suso naaagnas.

Matunob ka ha salog nga himo hin espeho nga nagkoprag

tipakadto hin altar nga an kandila mga halas.

Kapid-an nga mga mata an magtatan-aw han imo gindadanas

an imo sul-ot nga tikang pa hin gin-uulod nga palanas.

Maka-iripa an singsing ha tudlo mo nagraranggat

kay didto pa ito paghimo-a ha longib han mga kalag

hin diri na ma-ihap lumuton na nga mga saad.

Lilingi-on mo ako nga nagtitinawa nga ngarat.

Kahoman han bendisyon han padi nga’n karamoy kanan karas

hahadkan ko ikaw nga’n mga im-im may lara ug hamdas.

Mahangkop ka ha akon ngan magkakalopad kita tipagawas

kay sisibu-on kita hin kakabayohan nga mga lagas.

Matapo ha aton an nagsusoriyaw nga mgaamol nga garab

ngan sasabragan kita hin kinunot nga mga salag.

Kamausay iton babyi, iton lalaki may hiranat,

digwa han magduro-aw palibot han aton papag.

Bubudboran ko hin asin ug apog an mga olat han im’ lawas

Basi didto mangudlot, manaringsing aanak’ mga ogat.

Mahuring ka ha akon. Higugma-on, di na daw makagholat

an nagbibiribid nga kalayo ha ka-uudnan ko naglalarab.

Hala na, hala gad, antes matingka an alogan ug an salad.

Naglolobag nga magkakamang ka ngan imo bibidbiron

an kahulogan han mga inop nga tikang han akon lungon.

Labi ka nga magtatangis, igngunguyngoy an kakolop

nga kon hintagbo-an mo gad la an lawas ko nga naanod,

siguro daw ada, magbabakho ka, kon ikaw ginpukaw la

bangin man la ginlanat, hin-abtan mo pa ada

an hangyo han akon kalag antes ginsidman ngan nawara.

Hino ka, hino ka, pagli-os mo magpapaki-ana

kay waray na ha sapit mo an kahangkop han paghigda.

Hain na, hain na, kakayaknon mo an mga buta nga bentana

nga sagun-dalagan mabaton ha imo an damo nga mascara:

Linakat na, linakat na, an imo Hinigugma.

Gingawad hiya han agwason, mana-ol ngan ababakwa

ngadto hin kaggorangan hin simbolo hiya pagdanasa.

Ayaw igsubo, Minayuyo, kon an nahibilin nga hinumduman

os’ la nga ba-ol hin darag, punyal, sista ug hungot nga irimnan.

Pagtipigi gad gihapon, pagpotsa han akon lambong

ngan igsumpa ha atbang hi harap nga tibaraw,

binalighot nga mga tol-an,

nagkakanay nga tina-e ngan mga samad nga gin-igsan.

Pag-abot han takna nga’n ba-ol imo na tutoksan:

Karawta an halad ko: lus-ay nga mga polong, lamrag,

gugma an kadayonan.