MANA PATIK

Kolobikob na’n iya mga todlo.

Kibalon na’n mga palad.

An nanonolaw niya nga panit

Labi pa nga gindarahogan han adlaw

Han magkolop nga panaksak

Han kotikot ngan poti

Didto han kaingin ngan han dagohan.

Hobagon na’n iya mga sogbong

han pagpinas-an han alog

Han aga-kolop nga pag-inalog.

An gihot-gihot nga pag-abog han powang

Naghatag han iya boses hin makangingirhat nga pananglitan

Han iya ginlalaylay an kasogad han kablas

nga parag-oma.

Pamati-e la Intoy ini nga akon asoy

Kay basi kon dako ka na imo hinumdoman

An gintikangan han aton kabido-an.

Nahoyo man la an bata nga nakadto han powang.

Nahinunumdoman ko ngani hi Mana Patik

Ngan han kagorangan han Molino

Nahinunumdoman ko liwat an hagtaas nga mga toog

Nga nakadto ginlologaringan an ka-igangan,

An kaabokayan ha panahon han Katbari,

An hamot han linopak nga minantika nga pilit

Antes pagpotson ito hin dahon han balante,

An rasa han hinatokan nga olaning ug korakdot,

An naghihibaton-baton nga huni han atatahilaw ug tukmo

Ngan han matarotam-is ngan mahagkotay nga tubig

Nga tikang hin daan ngan ginlolomot na nga biso.

Nahinunumdoman ko liwat an orhi nga mga polong ni Mana Patik.

Hi ikaw, Intoy, nga tidolhog ayaw gud hingalimot

An osahay tumokad ngain ka man ig-abot.