OSA NGA HALIPOT NGA ESTORYA PARA KAN LEIA

Han masogad ako ha imo kadako

May nagsomat ha akon

Nga kono hadto

An ka-isdaan maglipayon.

Didto han ira poroy-anan

Ha dagat han Maqueda,

Didto han kabagangbagan

Mag-ogropod hira, mag-orosa.

Makaroroyag kon dodomdomon

An damo nira nga kolor ug kahimo

Maka-iripa kon totooron

Nga hira ngatanan kanan Diyos himo.

Waray hira hadto kinahahadlokan

Maski nga-in hira magkalangoy

Ha salad ug bawbaw hadton kadagatan

Agsob katatawa, waray nagngongoyngoy.

Kon panahon nga may-ada ha ira

Napa-iraya ha salog pamonay

Tipa-ilawod opod han solog an iba

Pangina-on, pamasyada, panahoway.

Waray na gud masama pa han kinabuhi

Han ka-isdaan hadto han Maqueda

Diri sogad hit nahitatabo yana nga orhi

Waray honong nga da-ot an napeste ha ira.

Hobas o ta-ob, dolom o bolanon

Bohat nira yana amo nala’n pomalagiw

Maski hira nga-in kadto pagsosondon

Han tawo nga’n toyo pagtola, pagkilaw, pagpaksiw.

Kon diri hira madadakop han badil ug hilo

An koryente ug trol diri ha ira mapasaylo.

Diri ngani pagkotawon an kasalaran han tawo

Manggad han dagat kakawaton ug ignenegosyo.

Salit, Leia, boligi ako.

Igpahibaro ta ha ngatanan nga tawo

Nga pagtipigan ta, diri pagkaragan

An manggad han aton kadagatan.

Ka-iro han ka-isdaan, ka-iro mo man.

Di man nimo sayop kay baga ano man

Nga boot ka hokasan han imo katadongan

Ug inop hin kabobwason nga bolahan.