PAKSIW NGA PAROTPOT, SINARAKAN NGA BANGKALAS

Marasa nga sora an parotpot.

Labi na gud kon paksiw

Nga’n iginsabaw maaslom hin doro

nga sooy hin lobi

Ngan an ginpaksiwan osa nga tiko

Nga labi nga gintingka ngan ginparig-onan

Hin diri na ma-ihap nga botok

hin sungo nga mogos o anislag

kon di man oring nga bagol.

Kadam-an an diri naboot han parotpot

Kono tonokon, gudti-ay ngan waray onod.

May madali-ay nga paagi hin pagka-on hini nga isda

Nga di ka mahitotonok, mabubukog, ug

Labi na nga mahingangaroyag hini nga sora

Kon sogad ka ha akon nga hablas la

Ngan an ipinapadis, dara kay waray man ginpapa-ibhan,

Bangkalas nga bogas nga may sarak nga ma-is.

Agsob bokbokon, opahon nga mayagota

kanan kowartahan baya.

Pag-aanhon ta man

Kay osahay malowad na ngan masomo

An karingkit, bilanghoy ug gaway nga mika.

Baman an talyan osahay matari kon di man korad

Ngan an korot makatol-katol ha im-im.

Marin hin di ka na makagbolas han dagohan

Ug makapagpaalayon kon pamari o pamogas.

Ngan, labaw han ngatanan, waray daw panganga-onon

An harangdon han mga sogad ha aton nga oripon.